إنا لله و إنا إليه راجعون

النهاردة سمعت خبر ضايقني جداااااااااااا

كان عندنا شيخ بيخطب في جامع قريب من بيتي و كنت أيام تانية إعدادي بروح أصلي هناك

كان الشيخ يتكلم عن الإسلام و السياسة و كان أحيانا يجيب جرائد معاه و يناقش أحداث حصلت من ضوء الإسلام ،كان مرة كان فيه صورة في الجرنان ان ياسر عرفات كان بيبوس يد مادلين أولبريت فقعد يتكلم عن الموضوع ده و ان أزاي يبوس ايدها ،أصلا مينفعش شرعا غير ان ديه عدوتك لأنها رايضة ليك العيش في الذل و كده و فضل يتكلم في الموضوع ده


المهم أن الشيخ كان علي طول كده بيتكلم في السياسة و العراق و فلسطين و واجبنا ناحية الناس ديه و اننا أخوة في الله و كده

اللي بقي لسه سامعة أنه من خمس أيام جم أخواتنا البعده منهم لله أمن الدولة و خدوه و قعدوه معاهم في ضيافتهم لمده أربع أيام و أمبارح خرجوه و النهارده توفاه الله

مش عارف ليه أفتكرت محمود الجندي لما حرس الوالي خدوه عشان خبي عبد الله النديم في بيته في مسلسل "حديث الصباح و المساء" و رجع من هناك و رجله وارمة من الضرب و من كتر أحساسه بالإهانة مات في اليوم اللي بعده

سبحان الله النهارده برضه و انا بقرأ في كتاب من الكتب قرأت الحديث ده
قال رسول الله صلي الله عليه و سلم:"صنفان من أهل النار لم أرهما: قوم معهم سياط كأذناب البقر يضربون بها الناس..........." و حديث أخر :"سيكون في أخر الزمان شرطة يغدون في غضب الله و يروحون في سخط الله" و قال الإمام النووي إن اللي ماسكين السياط هم غلمان والي الشرطة

فعلا ،ربنا يكفينا شرهم اللهم أكفينيهم بحولك و قوتك وأمنع عنا أذاهم و بطشهم و أهدهم إليك يا الله،إنك ولي ذلك و القادر عليه