no title

شكلي كده هكتب كذا حاجة في بعض و مالهاش دعوه ببعض

--------------------
امبارح كان عندي انترفيوه في أي- المفروض ان الموضوع كله هياخد 15 دقيقة بس سبحان الله الراجل اللي معايا اتجنن و قعد معايا ساعة إلا ربع او إلا 10 دقائق، و خلاني اقول حاجات كتير اوووووي تقريبا محدش يعرفها

بعد ما خلصت قعدت افكر، انا ليه مش بحب المقابلات الشخصية؟؟؟؟
-لقيت السبب انها بتكشفني قدام نفسي و كمان قدام الناس، بتخليني اقول حاجات كتير عن نفسي و انا مش بحب كده
بقعد اقول نفسي في ايه ؟و عايز اكون ايه لما اكبر؟؟ و كلام كده يعني و انا مش بحب عادة الناس تعرف اللي جوايا او الحاجات اللي بفكر فيها و حتي لو عايز حد يعرف يبقي واحد عارفه من زمان حد قريبي واحد صاحبي مش واحد مش عارفه اصلا ، بعيد عن ان اللي كان بيعملي المقابلة شخصية محترمة لابعد حد و انه متدين علي ما يبدو عليه و ده اداني مساحة كويسة من الحرية بس برضة مش بحب المقابلات الشخصية

شكلي كده قريب هقرر اني ابطل اشارك في اي نشاطات في الكلية عشان اخلص من القرف بتاع المقابلات الشخصية بس اللي مصبرني اني لازم اتعود عليها عشان لما ربنا يرزقني و اخلص الكلية و اروح اقدم لاي شغل فطبيعي لازم يتعملي مقابلة
--------------------------------------------------------
النهاردة في المجلس الموقر-مجلس سيد قراره(و اسمه التاني مجلس موافقة)-كان بتجري مناقشات علي تعديلات الدستور اللي هتخلي البلد خراب اكتر من الاول،ما هي البلد ناقصة اصلا، المهم كان النواب من المستقلين و الأخون و حزب الكرامة مع حزب التجمع و الناصري بيفكروا في طريقة لعرقلة تمرير التعديلات عن طريق الإستقالات الجماعية او الرفض او الخروج من الجلسة اثناء التصويت

و النهاردة بقي و هما بيناقشوا التعديلات خرج النواب و كان احد النواب المستقلين قال"يا عم النواب الاخوان لازم يستقيلوا عشان بوز الليلة علي الحكومة" فكان رد مصطفي بكري عليه مقنع جدا:"ما هم لو استقالوا هيتقبض عليهم" طب يعني ايه الحل؟؟؟؟

شكلها كده هتمشي بطيخ كالعادة و الموضوع هيطبخ و الدستور هيتعدل و البلد هتخرب اكتر من كده
----------------------------------------------------------
النهاردة كان فيه خبر ممتع جدا في الجرنان و هو ان 89% من الشعب موافق علي الحكومة مش عارف أزاي و كان ال ناس دول مش هما اللي بيتظاهروا في مصانع الغزل و النسيج أو علي أراضي وزارة الأوقاف او الفلاحين اللي القطن اللي زرعوه لسه عندهم عشان تقاوي من الحكومة بايطة خالت القطن ملون ولا الناس اللي اهاليهم ماتوا في محرقة بني سويف و الموضوع اطبخ عشان الصغيرين يلبسوه او اللي ماتوا في العبارة و الحكومة هربت المسؤولين و لا بتوه اكياس الدم و لا ..................... مش عارف بقي النسبة ديه جت ازاي و إن كانت فكرتني بالنسبة اللي فاز الريس بها في الأنتخابات
تخيلت حوار مع الناس حوالين الدراسة ديه
واحد من مجلس الوزراء هيكلم فلاح في قرية مش علي الخريطة

-المسؤول: عامل إيه يا حاج؟؟
-الفلاح: بخير يا بيه نشكره
المسؤول: انا من مجلس الوزراء يا حاج و عايز اسالك كده علي حاجة
الفلاح: طبعا يا بيه اتفضل استريح الاول، انت يا واد يا بن البرطوشة هات كرسي للباشا بتاع الوزرا
المسؤول: ايه رأيك في الحكومة يا حج؟؟؟
الفلاح:(الراجل يفتكر صاحبه المتعلم اللي محبوس عشان كان ماشي في التحرير وقت مظاهرة بيقضي مصلحة)تمام اوي يا باشا، ربنا يخليلنا الحكومة مش مخليانا عايزين حاجة خالص
المسؤول: ازاي يا حاج انت مش سامع عن المظاهرات اللي في البلد؟؟
الفلاح: مظاهرات ايه يا بيه؟؟ ربنا يخليك انا عندي عيال عايز ارابيهم، اكيد دول ناس بعتاهم اسرائيل عشان يبوزوا البلد يا بيه
المسؤول: طب هات مراتك نسألها
الفلاح: تعالي يا وليه انت هنا خلي اليوم ده يعدي علي خير
الست:ايوه يا باشا ،ابوس ايدك احنا مالناش في حاجة،سيبولنا حته الأرض اللي بنسترزق منها
المسؤول: ايه رأيك في الحكومة يا ست انتي؟؟
الست: ميه ميه يا بيه، دول حته لو عايزين حته الأرض يخدوها يا باشا بس انا عارفه طيبه قلب الريس مش هيرضي نموت من الجوع
المسؤول: سيادة الريس؟؟؟ طبعا طبعا ربنا يخاليه لينا دحنا عايشين بحسه(ما يكونوش الناس ده مخبرين عايزين يعرفوا انا بحب الريس و لا لا؟؟)-طب سلام بقي يا مواطنين عشان الحق اخلص الدراسة

اعتقد الموضوع وصل هما ازاي وصلوا للنتيجه ديه
---------------------------------------------------------------

فيه في الدستور مادة بدل قانون الطوارئ و هو قانون الإرهاب، القانون ده هيتيح للشرطة التجسس علي المكالمات دول ابداء سبب غير ان يتيح للرئيس تحويل اي معتقل من المحاكمة في المحاكم المدنيه للمحاكم العسكرية دون ابداء اي سبب

و ده عشان شعار الحكومة في التعديلات الدستورية"مع قانون الإرهاب الجديد، مش هتقدر تخرج بره بيتك"- مع تحيات أمن الدولة

------------------------------------------------------------------

ربنا يستر عليكي يا بلدي

bema en 3agabko el clips beta3t el sha3era eman el bakry,deh more vedios leha

ايه رأيكم في احلامه؟؟؟

بسيطة اوووووي، انا و انت بنقدر نعملها بسهولة بس مش حاسين هي كبيرة و فارقة عند الناس ازاي

مش حاسين بعظمها ، و لان الانسان مش بيحس بقيمة الحاجة إلا في الغالب لما بيفقدها

يا رب ربنا يدومها علبنا نعم و يحفظها لينا و يسامحنا علي ما كان منا

she3r esmo "el 7omar" bas gamed gdn ,listen it



w law 3agbetak ely bet2ol el she3r,fa dah vedio feh 3 pieces of poetry heya bet2olhom bas bardo gamden awwwwwwwy

عندما سئلت جولدا مائير

النهارده و انا بقرأ المصري اليوم علي النت كعادتي كل يوم قريت خبر جامد جدا الصراحة

----------------------------------------------------------------------------
وجه أحمد أبوالغيط «وزير الخارجية» تحذيرا شديد اللهجة من المساس بالمقدسات الدينية في الأراضي الفلسطينية،
وقال أبوالغيط ـ في تصريحات صحفية أمس ـ من يرد العيش في سلام داخل هذه المنطقة فعليه أن يصون أولي القبلتين وثالث الحرمين الشريفين، وأن يراعي جميع المقدسات الدينية في هذه البقعة الشريفة من العالم.

المصري اليوم-4\3\2007

-----------------------------------------------------------------------------
مش عارف ليه افتكرت لما سئلوا جولدا مائير رئيسة وزراء إسرائيل

-المحاور: ايه أصعب يوم مر علي جولدا مائير؟؟؟
جولدا مائير: يوم حرق المسجد الأقصي
-المحاور: طب و ايه اجمل عشية يوم مر عليكي؟؟؟
-جولدا مائير :عشية حرق المسجد الأقصي و تمنيت اننا كنا هدمنا المسجد مش حرقناه بس بعد ردود الأفعال الضعيفة اللي تلقي بها العرب الخبر
-المحاور: امتي تعتقدي في حدوث الحرب بين المسلمين و الإسرائيليين المذكورة في التوراه؟؟؟
-جولدا مائير: لما يبقي عدد المسلمين في صلاة الفجر زي عددهم في صلاة الجمعة ، بس مش الجيل ده من اليهود هو اللي هيتغلب و لا هما دول المسلمين اللي هينتصروا علينا و يبعدونا عن أرض المعاد

اعتقد الرسالة وصلت، و زي ما قال الكاتب الكبير هيكل في برنامج(مع هيكل) اللي بيذاع علي الجزيرة
"عندما يكرر التاريخ نفسه ففي المرة الأولي تكون النتيجة كارثة و في المرة الثانية تكون النتيجة ميلودراماتيكيه و لكن يبدو اننا لا نعي دروس التاريخ"- و هي ديه الحاله الموجوده حاليا

فعندما علم العرب بالحفريات تحت المسجد الأقصي و بهدم طريق المغاربة قاموا بنفس ردود الأفعال التي فعلوها عندما حٌرق المسجد الأقصي

فلك الله يا أولي القبلتين و ثالث الحرمين

الأولي:

أدفن وجودك في أرض الخمول

فما نبت مما لم يتم زرعه لا يتم نتاجه


الثانية:

ما نفع القلب مثل عزله يدخل بها ميدان فكرة

mesh 3arf el title yeb2a eh besara7a

بقالي فترة كده في كرب كبير شوية و هم تاعبني أوووووووووووي

حاجات كانت اتشالت من دماغي من زمان بس اليومين دول الشيطان و هوي النفس عمالين يلحوا عليا جامد جدااااااااااااا

بالرغم اني عارف وسيلة للحل شوية بس حتي مش قادر اعمله

بس فعلا تعبان نفسيا و عمال افكر كتيييير أوووووي و احيانا ابقي خلاص علي وشك بس ربنا يستر

و الحاجات اللي عملتها و كنت فخور اوووووي اني قررت كده اخيرا بدأت نفسي تلح علي اني اتراجع عنها

اللهم فرج لي همي و فك لي كربي و لا تتركني اتخبط بين الشيطان و هوي نفسي

اللهم اعني علي نفسي و أعوذ بك من الشيطان الذي يريد ان يهلكني

اللهم ثبتني علي دينك

اللهم أستجب يا الله

و لسه بحبك يا بلدي

و لسه بحبك يا بلدي
و دايب في سمرة شمسك
و لسه بحبك ريحه هواكي
مهما كان مليان دخان
ولسه بعشق وش طفلك
اللي بيبتسم لكل الناس
و لسه هقول و بقول بحبك يا بلدي
بحبك يا بلدي
-------------------------------------------------------------
بالرغم من اني بعشق بلدي، بس بحب انتقد الغلط فيها يمكن يجي اليوم اللي انا أو انت نغير فيها اللي مش عاجبنا، اللهم اعنا علي ذلك
------------------------------------------------------------
هتكلم علي قصص حوالين الأسعاف و المستشفيات المصرية اللي للأسف بقي شعارها الداخل مفقود و الخارج شحات

أم مع ولادها الاتنين علي طريق البحر الأحمر عمالين يهزروا مع بعض و يضحكوا ، صوت ضحكهم منور الدنيا بس مش عارفين انهم علي معاد مع ملك الموت نتيجة الإهمال

و العربية ماشية، انفجر اطار العربية العربية اتقلبت العربية دلوقتي دردية علي جنب الطريق، الام مغمي عليها و الولدين (ولد و بنت) غارقنين في دمهم،و تصحي الام و تبص علي ولدها و تبكي الام بحرقة و ترفع موبايلها و تطلب الوحدين عشان يساعدوها و هي الإسعاف

-الام: الو ، الحقونا احنا عمالنا حادثة علي طريق البحر الاحمر و الولاد هيروحوا مني
العامل المسؤول عن اللرد: انتوا مصريين و لا أجانب؟؟
الام: لا احنا مصريين (سؤال غريب و كأن الأجانب هما اللي لازم يعيشوا)-للأسف
-العامل: خلاص احنا هنبعت علربية حالا
الام فضلت مستنية العربية، سامعة صوت ولادها و هما بيعيطوا من الألم و التعب، عماله تمسح الدم من علي وشهم ، معلش انا اسفة يا ولادي ، عشان خاطري خليكوا معايا، سامعني يا ابني؟؟ سامعاني يا بنتي

شوية كتير حوالي ساعة و العربية لسه موصلتش، الام هتكلم الإسعاف تاني
الام: حرام عليكوا، العايلين غارقنين في دمهم و بقالنا ساعة و محدش جه
العامل: هم انتوا مصريين و لا أجانب؟؟؟؟!!!!!!!!!!!!!
الام تفتكر ان الولدين معاهم جنسية فرنسية : لا أجانب يا غبيييييييييييييي الحقونا بسرعة
العامل: ثوابي و هنكون عندكم
و تيجي العربية بسرعة و تشيل الولدين و للأسف الولدين كانوا علي معاد مع ملك الموت

متخيل حرقة الام علي ولدها للي راحوا من ايديها عشان هما اصلا مصريين و عشان نسيت تقول انهم اجانب، و عشان حق العيش بقي للأجنبي بس اما المصريين فدول خلاص بقوا 80 مليون ، فيها ايه يعني لو واحد و لا اتنين ماتوا و لا حتي عبارة فيها 1000 واحد ، و كأن المصري بقي فعلا تراب العالم و لا عزاء للمصريين اللي مش معاهم اي جنسية
-----------------------------------------------------------------
و لسه مع الوزارة الرائعة وزارة الصحة بس دلوقتي في مستشفي من المستشفيات و السبب دكتور

ام برضه كانت مع ابنها الصغير و الولد عمل حادثة جامدة و الولد بيموت و الام بسيطة جدا و كان المسؤؤل انه يشوفوه دكتور و معاه دكتور شاب صغير
الدكتور الكبير لما شافه قعد يفكر يا تري ده عنده التهاب في المخ و لا نزيف في المخ و كل ده الولد الصغير قدامه عمال يتألم
فالدكتور الشاب قاله: طب يا دكتور نوديه بس الرعاية المركزة و هناك نبقي نفكر
الدكتور الكبير: لا طبعا ، انت عايزهم يقولوا اني مش عارف اشخص حالته و لا ايه؟؟؟
و راح الدكتور الكبير جايب الكتب و قعد يشوف فيها عشان يعرف الولد عنده ايه و كل ده و الولد مرمي قدامه
و في الأخر قال لأمه: روحي هاتي بلازما من الصيدلية ، مع انه عارف ان البلازما بحوالي 500 جنيه و الأم فقيرة من شكلها

فقعدت الام تعيط "منين يا رب اجيب الفلوس ديه" ففضلت الام تلف علي الناس عشان الفلوس و في الوقت ده الولد مات
فالدكتور الشاب: ده الولد مات يا دكتورّّ!!! مش نقول للست بدل ماهي بتجمع الفلوس و عماله تعيط كده
الدكتور الكبير: نقولها!!!! خلاص قولها و هتتحول للتحقيق

و طبعا من الخوف من جبروت الدكتور الكبير، مقلهاش الدكتور الشاب ، متخيل منظر الام بعد ما بهدلت كرامتها للناس تشحت عشان ابنها اللي موتوه بالجهل و الجبروت
كتخيلين منظرها و هي راجعة بتجري بالبلازما و في الأخر يقولولها ده مات!!!!! ايه ممكن يساوي غضبها علي موت ابنها بسبب الدكتور الكبير
متخيلين دموعها و صويتها علي ابنها اللي مات قدام عينيها

اعتقد لازم ففي طب يدوهم ماده "ترقيق القلوب" أو ماده "إغاثة الدكتور من موت قلبه" أو علي الأقل يدوهم ماده"حقوق المواطن المصري في العصور ما قبل 1981" - و طبعا في غير القصص ديه الكتير و الكتييييييييييييييييييييييييييييييييييير